the feeling of an artist

العربية بقت تحفه فنية

طبعاً كلنا في القاهرة المحروسة بنعاني شر المعاناة من المواصلات اللعينة ومن جشع سواقين التاكسي وبالذات بعد ما البنزين غلي. بجد يعني صباح الإستغلال البنزين غلي 30% راح سواقيت التاكسي مغليين 70% ولو فتحت بقك معاهم يقولك "البنزيم غلي يا بيه" مع إن الغالبية العظمى منهم حولوا عربياتهم غاز.

المهم أنا بجد بعد ما البنزين غلي لقيت إني لازم أشتري عربية عشان أنا شايف عكس كل الناس إن العربية بقت أوفر لما البنزين غلي عشان لو إنت عاوز تركب تاكسي من العباسية لرمسيس دلوقت السواق هاياخد منك أقل واجب 4-5 جنية، بينما في العربية مش هاتحرق أكتر من نصف لتر بأي حال من اﻷحوال.

أنا كمان قررت إني أجيب عربية عشان أنا شغلي هايتنقل أول طريق مصر إسكندرية الصحراوي وكمان عشان أهلي كبروا في السن وكتير بيحتاجوا أنهم يروحوا مشاويرهم بطريقة آدمية.

أنا طبعاً كنت عاوز عربية مستعملة بس تكون معقولة يعني ، تكون فيها شئ من الرفاهية كمان عشان أنا مش جايبها عشان أتعذب بيها يعني.

بدأت أدور في مواقع الإنترنت الخاصة ببيع وشراء العربيات، وبجد لقيت العجب.

تلاقي واحد عاوز يبيع عربية 131 موديل 1982 بـ 40000 !!!!!!!!!

عربية بقالها 25 سنة ماشية قي الشوارع وصاحبها عاوز يبيعها بـ 40000!!! ليه إن شاء الله.
ويا ريتها عربية محترمة مثلاً، إنما دية أصلاً عربية راكب فيها موتور ماكينة خياطة مش موتور عربية!

عربية هوندا سيفيك موديل 1993 بـ 70000! أمال الجديدة تتباع بكام بقى إن شاء الله!

عربية جولف موديل 1986 وجايبة شاسية وحالتها صعبة بـ 38 ألف!

بجد يعني سوق العربيات ده عامل زي مسرح العبث يعني المبدأ اللي سائد فيه هو "أي كلام في أي حتة"

انا بقيت أحس كمان إن العربيات دية بقت عاملة زي التحف الفنيةـ يعني كل واحد حر يقول أي سعر للعربية عشان العربية دية تحفة فنيه!

حسبي الله ونعم الوكيل

posted by Mountaineer™ @ ١٠:٤٠ ص