الحلقه الرابعه: أنا عاوز أروح لأمي
أول ما طلعنا من المطار الجو كان جميل جداً والشوارع نضيفه جداً زي أوروبا وأجمل كمان.
طبعاً كنا متلخبطين جداً في السواقه عشان أول مره نسوق في بلد الدريكسيون فيها على اليمين, ده غير طبعاً إن دي بلد أجنبيه أول مره نروحها ومش عارفين فيها أي حاجه وكان كل إعتمادنا على الجي بي إس بتاع الموبايل اللي صاحبي لسه شاريه وما كناش لسه عارفين نتعامل معاه أوي ...
لما بعدنا شويه عن المطار بدأنا نشوف مناظر طبيعيه ومساحات خضراء لا متناهيه وكان شئ مبهج جداً ... بس فجأه كده وفي ظرف 3 دقائق أو أقل الجو قلب قلبه سوده ... فجأه لقينا برق ورعد رهيب ومطر سيول جباره و كل ده وإحنا أصلاً ملبوخين خلقه.
شويه كده المطره زادت جداً وكنت خايف تمطر برد, اللي هو كرات ثلج صغيره عشان ده ممكن يدمر العربيه اللي مأجرينها ... فعلاً مخاوفي تحققت والدنيا مطرت برد شديد لدرجة إننا كنا خايفين الإزاز يتكسر.
شويه ولقينا عربية إسعاف مقلوبه بالعرض في وسط الطريق بالظبط وده جابلنا هلع، إحنا ما كناش عارفين هي العاصفه دي تعتبر عاديه ولا دي عاصفه جامده بالنسبه لهم؟ بس موضوع العربيه المقلوبه ده حسسنا إننا بنشهد كارثه طبيعيه.
حاولنا نركن على جنب لحد ما المطره تهدى بس ماكناش عارفين نركن على اليمين ولا الشمال .... كنا متلخبطين وخايفين كمان. صاحبي كمان كان خايف نركن جنب الغابه يطلع علينا أسد ولا حيوان مفترس :) طبعاً بعد كده إحنا عرفنا إن الخوف ده ما كانش في محله عشان الحيوانات المفترسه يتعيش في أماكن معينه محدوده.
بجد كنا خايفين ومرتبكين وكان لسان حالنا يردد: أنا عاوز أروح لأمي :)
المهم: فضلنا نخبط ونتوه لمدة ساعه ونصف تقريباً لحد ما الحمد لله وصلنا الفندق بسلام مع إن المشوار كان كتيره نصف ساعه.
الفندق كان شغال يعني ... مش أحسن حاجه في الدنيا بس يقضي الغرض. بس هو موقعه كان حلو جداً
ريحنا شويه وبعد كده نزلنا على المغرب كده عشان ناكل.
رحنا مول ظريف جداً قرب الفندق. المول ده اللي جنبه ساحة نيلسون مانديلا اللي فيها التمثال العملاق بتاعه
الملاحظ إن كان في عرب كتير أوي وده كان شئ غريب بالنسبه لنا
الشئ الظريف في جنوب أفريقيا إن معظم المطاعم العالميه هناك بتقدم أكل حلال: كنتاكي وماكدونالدز وكده فا ماكناش بنلاقي صعوبه في الأكل خالص.
بعد ما أكلنا وإتفسحنا شويه في المول قررنا نروح عشان كنا تعبانين من السفر. لما وصلنا الفندق لقينا مفاجئه غير ساره ... النور مقطوع :(
وده موضوع الحلقه الجايه: صراخ في الظلام
posted by Mountaineer™ @ ٣:٢١ م
0
comments
